ಕರ್ನಾಟಕ ರಾಜ್ಯದಲ್ಲಿ ಬೆಲೆ ಏರಿಕೆಯ ಅರ್ಭಟ: ಹೋಟೆಲ್ ತಿನಿಸುಗಳ ದರ ಹೆಚ್ಚಳ ಅನಿವಾರ್ಯ

ಕರ್ನಾಟಕದಲ್ಲಿ ಅಗತ್ಯ ವಸ್ತುಗಳ ದರವು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಈ ನಡುವೆ, ರಾಜ್ಯ ಸರ್ಕಾರ ಹಾಲಿನ ದರವನ್ನು ಪ್ರತಿ ಲೀಟರ್ ₹4 ಹೆಚ್ಚಿಸಿದೆ. ಇದಕ್ಕೂ ಮುನ್ನ ವಿದ್ಯುತ್ ದರ ಏರಿಕೆ ಜಾರಿಯಾಗಿತ್ತು. ಈ ನಿರಂತರ ಬೆಲೆ ಏರಿಕೆಯ ಪರಿಣಾಮವಾಗಿ ಪ್ರಯಾಣ ಟಿಕೆಟ್ ದರಗಳು ಸೇರಿದಂತೆ ಎಲ್ಲ ವಸ್ತುಗಳ ಮೌಲ್ಯ ಹೆಚ್ಚುತ್ತಿದೆ, ಜನರು ದಿನನಿತ್ಯದ ಖರ್ಚಿನೊಂದಿಗೆ ಹೈರಾಣಾಗುತ್ತಿದ್ದಾರೆ.

ಹೋಟೆಲ್ ತಿನಿಸುಗಳ ದರ ಏರಿಕೆ ನಿರ್ಧಾರ

ಹೋಟೆಲ್ ಉದ್ಯಮದ ಮೇಲೆ ಹಾಲು ಹಾಗೂ ವಿದ್ಯುತ್ ದರ ಏರಿಕೆಯ ನೇರ ಪರಿಣಾಮ ಬೀಳುತ್ತಿದ್ದು, ಹೊಟೆಲ್ ಮಾಲೀಕರು ತಿನಿಸುಗಳ ದರ ಪರಿಷ್ಕರಿಸಲು ಸಿದ್ದರಾಗಿದ್ದಾರೆ. ನಂದಿನ ಹಾಲು ಮತ್ತು ಮೊಸರು ದರ ಪರಿಷ್ಕರಣೆ ಹೋಟೆಲ್ ವೃತ್ತಿಯಲ್ಲಿ ಆರ್ಥಿಕ ಹೊಡೆತ ಉಂಟುಮಾಡಿದೆ, ಇದರಿಂದ ಕಾಫಿ, ತಿಂಡಿ, ಊಟ ಹಾಗೂ ಇತರ ಹೋಟೆಲ್ ತಿನಿಸುಗಳ ದರ ಹೆಚ್ಚಿಸಲು ತೀರ್ಮಾನಿಸಲಾಗಿದೆ.

ಹೋಟೆಲ್ ಉದ್ಯಮದ ಮೇಲೆ ನೇರ ಹೊಡೆತ

ನೂರಾರು ಹೋಟೆಲ್ ಮಾಲೀಕರು ಬೆಲೆ ಏರಿಕೆಯ ಪರಿಣಾಮದಿಂದ ನಷ್ಟ ಅನುಭವಿಸುವ ಸ್ಥಿತಿಗೆ ಬಂದಿದ್ದಾರೆ. ಏಪ್ರಿಲ್ 1ರಿಂದ ಹಾಲು ಮತ್ತು ಮೊಸರಿನ ದರ ಪ್ರತಿ ಲೀಟರ್ ₹4 ಹೆಚ್ಚಳಗೊಂಡಿದ್ದು, ಅದಕ್ಕೆ ಅನುಗುಣವಾಗಿ ಪ್ರತಿ ಯೂನಿಟ್ ವಿದ್ಯುತ್ ದರ 36 ಪೈಸೆ ಹೆಚ್ಚಿಸಲಾಗಿದೆ. ಹೋಟೆಲ್ ಉದ್ಯಮದಲ್ಲಿ ವಿದ್ಯುತ್ ಹಾಗೂ ಹಾಲು ಅವಿಭಾಜ್ಯವಾದುದರಿಂದ, ಈ ದರ ಏರಿಕೆ ಉದ್ಯಮವನ್ನು ಮತ್ತಷ್ಟು ನಷ್ಟಕ್ಕಿಳಿಸುವ ಭೀತಿ ಉಂಟಾಗಿದೆ.

ಹೋಟೆಲ್ ದರ ಪರಿಷ್ಕರಣೆ ಶೀಘ್ರದಲ್ಲೇ ಜಾರಿಗೆ

ಹೊಟೆಲ್ ಮಾಲೀಕರ ಸಂಘವು ಟೀ, ಕಾಫಿ, ತಿಂಡಿ ಮತ್ತು ಊಟದ ದರ ಪರಿಷ್ಕರಣೆ ಕುರಿತು ತೀರ್ಮಾನ ಕೈಗೊಳ್ಳಲು ಸಭೆ ಕರೆಯಲು ನಿರ್ಧರಿಸಿದೆ. ಸಭೆಯಲ್ಲಿ 10% – 15% ದರ ಹೆಚ್ಚಳದ ಬಗ್ಗೆ ಚರ್ಚೆ ನಡೆಯಲಿದ್ದು, ಏಪ್ರಿಲ್ ತಿಂಗಳಲ್ಲಿಯೇ ಪರಿಷ್ಕೃತ ದರಗಳು ಜಾರಿಗೆ ಬರಲಿದೆ.

ಜನಸಾಮಾನ್ಯರ ಖರ್ಚು ಹೆಚ್ಚಳ, ವ್ಯಾಪಾರ ಕುಸಿತದ ಆತಂಕ

ಹಾಲು, ದಿನಸಿ, ಅಡುಗೆ ಅನಿಲ, ವಿದ್ಯುತ್ ಸೇರಿದಂತೆ ಹಲವು ಅಗತ್ಯ ವಸ್ತುಗಳ ದರ ಹೆಚ್ಚಳದ ನೇರ ಪರಿಣಾಮ ಹೋಟೆಲ್ ಉದ್ಯಮದ ಮೇಲೆ ಬಿದ್ದಿದ್ದು, ವ್ಯಾಪಾರ ವಹಿವಾಟಿನಲ್ಲಿ ಕುಸಿತವಾಗಬಹುದು ಎಂಬ ಆತಂಕ ಹೋಟೆಲ್ ಮಾಲೀಕರನ್ನು ಕಾಡುತ್ತಿದೆ. ಜನರ ಖರ್ಚು ಹೆಚ್ಚಾದರೆ, ಹೋಟೆಲ್‌ಗಳಿಗೆ ಭೇಟಿ ನೀಡುವವರ ಸಂಖ್ಯೆ ಕಡಿಮೆಯಾಗುವ ಸಾಧ್ಯತೆ ಇದೆ.

ಇದು ಹೋಟೆಲ್ ಉದ್ಯಮ ಮಾತ್ರವಲ್ಲ, ಸಾರ್ವಜನಿಕರ ಆರ್ಥಿಕ ಬಜೆಟ್ ಮೇಲೂ ಪರಿಣಾಮ ಬೀರುತ್ತದೆ ಎಂದು ಹೋಟೆಲ್ ಮಾಲೀಕರು ಕಳವಳ ವ್ಯಕ್ತಪಡಿಸಿದ್ದಾರೆ.